Verkið Ikarus eftir mexíkósku listakonuna Rowenu Morales var unnið í Alþjóðlegri vinnustofu myndhöggvara sem haldin var í tengslum við Listahátíð í Hafnarfirði 1991. Skúlptúrinn stendur nú á lítilli eyju í Víðistaðatjörn, þar sem skærblá og græn formin speglast í yfirborði vatnsins og minna á goðsöguna sem verkið vísar til. Verkið er abstrakt og samsett úr hvössum, geómetrískum flötum og bylgjulaga línum en gul skífa trónir efst og líkist sól eða auga. Þá vísar endurspeglun verksins í vatninu með fínlegum hætti til falls Ikarusar í hafið – eftir að hann flaug of nærri sólinni. Á táknrænan hátt fangar listakonan þá djörfung og þrá sem fær menn til að dreyma um að fljúga og áhættuna sem því fylgir, líkt og sagan segir frá. Þannig undirstrikar verkið sambandið á milli falls og fíflsdirfsku, þyngdar og léttleika.

Rowena Morales er myndhöggvari sem er þekkt fyrir tjáningarþrungin og óhlutbundin verk í málmi. Í list sinni rannsakar hún gjarnan goðsagnir, sjálfsmynd og umbreytingu, þar sem litríkur myndheimur og sterk form skapa samruna hins persónulega og hins almenna. Morales stundaði listnám í Mexíkó og hefur sýnt verk sín víða, meðal annars í Evrópu og Bandaríkjunum. Henni var boðið að taka þátt í Listahátíð í Hafnarfirði 1991 og var verkið Ikarus gjöf hennar til bæjarins. Skúlptúrstíll Morales einkennist af sterkri tengingu við iðnaðarefni, þar sem hún miðlar ljóðrænni merkingu í gegnum hráa málma og táknrænar myndir og dregur þannig fram bæði menningarlega arfleifð og persónulegar frásagnir.